|
Poesia » 17/08/2013
Ammari! Ammari!. Di Cosimo Ottaviano
Si coci, si squata, comu si squagghia!
Ce sutati cu stu soli a ferragostu!
A mari ‘ndi tocca, puru senza na magghia!
Sciamu, mena, truvamu amprima nu postu.
La puddica e l’ovi lessi già so’ pronti,
a’nfriscu sta lu vinu e lu muloni,
e ce’ndi manca, nu cuppulinu a’nfronti?
Sira’ ch’è buenu pi l’insolazioni.
La ‘nchianata!: propria mo’ non’ci vulia,
sti cagnu ti pitali so’ ‘ccussì pisanti,
e a’ncueddu li visazzi, ce fatia!
Mo’ ‘rrivvaamu!! E ca c’etè quannanti?
Buenu mali c’alla spiaggia poi ‘nc’è la scinduta,
e ‘ssuca lu sutori cu nu bellu vintizzulu,
e no vuei ca pilla pressa ti va ‘cchiappu na catuta?
Ammari! Ammari!
Mi critunu ti tretu. “Uhe! No mi ‘llassati sulu”.
Cosimo Ottaviano
|
