|
Ce sta uardi voccapiertu?
Sta viti lu pesci scaricari?
Eti rrobba ti lu mari nuestru
a nui ndi piaci cufanari.
So tutti furastieri,
non ndi viti unu ti stu paisi,
cu varchi quantu vilieri
venn'a fannu li turnisi.
Pi ogne varca ca torna pi mmari
cu luzzi e tregghi tutti rringati
cientu ndi contu ogne sera tilari
e casci ti scampi chini 'ttumbati.
Fracaglia, scarpetti e brutettu
carni morta a iumara
scumbri, uccardi e quarche sguettu,
pisci cilesti senza tara.
La sera, nu camiu nculazza;
mancu carica e subbutu sparesci
senza cu faci chiazza,
lassa sulu puzza ti pesci.
Lu mari ndi sta scombrunu
e no ndi li sta 'ddunamu;
l'oru ti Brindisi ndi sta portunu
e tutti nui li sta uardamu.
Ndi la pigghiamu cu san Ghiatoru
ca eti amanti ti li furastieri
tinimu la miniera t'oru
ma no nd'amu mparatu lu mistieri.
Simu purtati pi la campagna,
la curtivamu e nci lassumu li camisi,
amu lassatu l'arvulu ti la cuncagna
pi ci veni ti fori paisi.
|
