Poesia » 03/03/2007

Stacchioddi cu lu sucu ti li brascioli. Di Giampiero Martinese

Tratta dal libro "La Stacchiodda", vi regalo questa ricetta, sperando che ogni tanto vi ricordiate anche di me, come in passato.
Un caro saluto alla città più bella del mondo ed al sito che ne è espressione in rete.

STACCHIODDI CU LU SUCU TI LI BRASCIOLI

Stindi larga na fittina
ti cavaddu o ti vaccina,
mitti sobbra putrisinu,
agghiu, pepi e pecurinu.

Ci no tieni pecurinu,
nci pue' mettiri l'Auricchiu,
basta sulu cu no' manca
picchi picchi ti tiaulicchiu.

Cu no' essi quedda rrobba,
mo dda fedd'a nturtigghiari,
usa filu ti cuttoni
cu la pueti po' ttaccari.

Allu fuecu na padella,
intra uegghiu casaluru,
sprici friscu nu spunzali,
vi' ce addori ti sicuru!

Quandu la cipodda è spritta,
cala intra la brasciola,
e cu la furcina a manu,
l'ha vutari chianu chianu.

Lu momentu è dilicatu,
fissa ti l'ha cucitari,
basta n'attimu ti spuesti,
e si poti po' brusciari.

Quandu l'uegghiu s'è ssucatu,
mitti salza o 'na pelata,
e cu 'na cucchiara an manu,
danci mo'na rrivutata.

Pi do' ori a cucinari,
ma cu fervi chianu chianu,
mitti sali quantu basta,
no ti fa' scappa' la manu.

'Ntra nu piattu alli stacchioddi,
cu 'ddu sucu 'na rrussata
e cu la ricotta 'skanti
po'nci fa'na 'ntunacata.

Statti certu ca ci Bossi
sce ssaggiava dda rizetta
affanculu sce mandava
risi, bisi e cutuletta!!!

Giampiero Martinese