Poesia » 13/09/2009

'Ntirrucativu. Di Pino Summa

Pino Summa, è un brindisino D.O.C., nato per caso a Crotone da genitori brindisini. Dice: "Quando mi coglie l'estro, scrivo qualche poesia in vernacolo".
Questa è la sua ultima 'Ntirrucativu (Breve dissertazione sui “Massimi Sistemi” della Filosofia…spicciola: una specie di “Vangelo secondo… Pino”).

'Ntirrucativu

Ce t’aggiu ‘ntisu alla tilivisioni:
Ca è ‘ccuminzatu a ffa’ nu luengu viaggiu
Nu massu, nu chilomutru ti raggiu,
Pi’ trasi’ cu la terra a cullisioni!

E subbutu nu mari ti scinziati,
Ca ‘pprufittunu sempri, all’occasioni,
Cu ti portunu cunti e privisioni,
Dici: “putimu stari scuscitati!”

Comu ca loru stannu sempri attienti,
E ca so’ ‘ddivintati tutti mestri,
Cu fannu sta’ tranquilli ‘sti tirrestri:
Ca sontu tutti fessi, e no’ cuscienti.

Mo’ vue’ nu figghiu? E fattulu “in provetta”;
‘Ndi vuei n’atru, e cu ti ‘ssumigghia?
Nu buttu ti vilenu cu li pigghia!
Cu nu cloni, la copia essi pirfetta.

Vue’ viti lu giutiziu univirzali?
‘Ccumenzunu a circa’ ‘ntra na cascetta…
E t’acchiunu a mumentu la rizzetta:
Li celluli, eccu a quai, staminali!

Poca no’ criti addo’ annu sce ‘rrivvatu,
E sapi ‘zign’addoni ann’a parari
Cu quiddu ca ti ponnu sce ‘nvintari!
Iu all’ora ti mo’, m’era stancatu.

Quandu sentu parla’ ti ‘ddi ‘nvinzioni,
Ca sontu, forzi forzi, puru bueni,
Mi sentu comu ciucciu ‘ntra li sueni…
E so’ custriettu a fa’ ‘sti riflissioni:

Uardu an cielu, la notti eti stillata,
E bbabbu annanti a quiddu firmamentu!
Mi sentu sia nu ‘nziddu, a ‘ddu mumentu:
“Ma ‘sta machina, penzu, a ddo’ è ‘ppuggiata?”

Esisti nu “Cirvieddu onnipotenti”
Cu ‘rriva a crea tanta pirfizioni?
O eti sulamenti n’illusioni?
Pircè niente, po’ assiri ti lu nienti!

Ci tuttu allora eti sempri statu,
Iddu c’è fattu: sulu lu demiurgu;
Comu ‘ntra nu ‘spitali lu chirurgu?
‘Stu mundu e Iddu: ci è ca l’è criatu?

E ci po’, veramenti, esisti Diu,
Tocc’a spiccia a ‘ndi tai l’intuiziuni,
Cu putimu truvà li suluziuni…
Ci noni Diu lu pozzu fa’ pur’iu!

Ci sciamu ti ‘stu passu, na sciurnata
Va’ sentu ca nu paru ti scinziati,
Sontu ‘rrivati a ‘ncierti risurtati,
Cu fannu fa’ allu soli…na vutata!

O sobbr’a nu giurnali naziunali,
‘Sti tituli ti crandi sinzazioni:
“Scopri sistema ti risurrizioni!”-
“Referendum; suffraggiu univirzali!”

E mi camardu appriessu a ‘sti pinzieri;
Allu cunquibbus, no’ so’ cchiù sicuru
Ti Platoni, Aristotili e Epicuru…
E la capu spitterra ti misteri.

Ginu Carrozzu, c’alla rima è forti,
Mi tici: “Fani comu fazzu iu:
Quandu mi ‘ddonu ca sta penzu a Diu,
Lassu… e va’ mettu an croci la cunzorti!

E ci pienzi ca Iddu ti sta veti,
No’ ti ‘ndi sce futtendu propria nienti;
Rumani a ‘sti prubbliemi ‘ndiffirenti,
Tanta… ‘nc’è… lu misteru ti la Fedi!”

Pino Summa