Poesia » 20/10/2009

La culonna e la funtana. Di Alfieri Carbone

‘Nu giurnu scia cirnendu la culonna
e decisi cu vai allu Casali
-“Moi,dissi,aggia sce’ truvari
Lu Monumentu ca amme’ m’eti cumpari…”

Si misi a caminari a passu lientu
Pinzando all’amicu Monumentu
-“Ci no vau iu, mo si movi du crimoni
Iertu iertu a forma ti timoni!”

Rrivvata alla scinduta ti la Saca
Si firmau ‘dda quidd’atra strasciddata,
la funtana ca Tancreti feci azari
pircè la figghia sua s’era spusari…

-“Cumma’,mi sta pari strana”,
ci dissi alla colonna la funtana
anni erunu ca no ti vitia,
sempri cchiu bedda ti faci ssignuria!”

-“Pirceni, no liggi an facci alli giurnali
li femmini ca si fannu restaurari?
lu dottori mia era assai lientu…
nci misi quindici anni tra lacrimi e turmientu…

Mo pero’ stau bbona e aggiu rinata,
mi sentu la padrona ,sobbra la Scalinata
e vesciu passari ti lu Belvideri
vagnuni pittacchiati, zambri e furestieri…

L’unica cosa,ci no ti nda ddunata,
eti la capu,ca mi l’hannu cangiata…
quedda vecchia stai intra a ‘nu palazzu bellu
e dici ca si chiama CAPITELLU…!”

-“E si, risposi quedda risintuta…
A tei t’hannu spugghiata e rivistuta…
La capu tua ‘ntra lu palazzu ti Nervegna,
iu chena ti mundezza e ti cramegna!”

-“Aqquai stai bona,eti ‘nu postu d’oru…
Ci pienzi quandu rriva San Ghiatoru?
La notti no ci tormu pi li vagnuncieddi,
li botti ti li fuechi e pi li bancarelli…

A tei, assai ca ti va ‘ mali
sienti li sireni ti la Pulizia Municipali…
Eppoi, cu mei tui ti ue mitti?
Ci propria propria…. Va parla cu MENNITTI! “

Alfieri Carbone