Poesia » 11/11/2009

Brindisi ti na vota. Di Mario Galasso

Ho scoperto il vostro sito per caso. Sono di Brindisi, ma vivo ad Alghero da molti anni, anche se il mio cuore è ancora legato al Salento.
Ho 68 anni, e sono nipote di Alfredo Galasso, poeta dialettale purtroppo ricordato solo per la poesia Lu pipitu e non per tutte la sua bella produzione poetica.
Mio padre era Ugo Galasso, insegnante elementare a Brindisi, sulla cui figura stiamo anche cercando di fare un convegno con l'università del Salento per scandagliare i rapporti fra fascismo e scuola a Brindisi fra il 1925 e 1935.
Mi è venuta immediata voglia di scrivere qualcosa da mandarvi e ne è uscita fuori questa poesia che vi mando perchè sia immessa nel sito, sempre che piaccia.

Brindisi ti na vota

Brindisi ti na vota Gne tantu nci va ppienzu a Brindisi cum’era, di quandu scia alla chiazza ‘nchianando na scalera;
cu ttanuma alla rreta ca forte mi dicìa: no’ scaracchiari a ‘nterra, ci no ti drizzu iu.
O quando scia alli sciabbichi o abbasciu alla marina, pisciandu tretu all’arvuli o tretu a nna banchina;
eru vagnoni, tiavulu, sempri cu la fumìa ti fari quarche cosa nziemi all’amici mia,
sciucari cu lu curru, vattiendumi cull’atri, li scarpi sempri ruetti, cazuni ripizzati;

O quandu scìa alla spiaggia, a Santa Apullinari, sobbr’allu vapurettu, ca nò tinìa cce fari.
Lu proprietario poi ca Coco si chiamava, “Saliate” nci dicìa e forti iastemava.
Lli tavu deci lire pi la navigazioni, nchianavu cu nu saltu sobbr’all’imbarcazioni.
Quandu iddu era convintu ca si putìa partiri cu lu mutori disel ca lu facìa muriri
A manu lu girava, lu fumu s’indassìa, la varca chianu chianu di Brindisi partìa.

Quedda menz’ora critimi non la pozzu scurdari, l’azzurru ti lu mari, lu vientu e li panari
chini ti pumbitori, ca s’indassiunu fori, ti pasta cu lu sucu, ti casu e ti culori.
Li femmini sudati, la puzza ti lu fumu, lu cardu e lu rumori, l’affutu ti quarcunu.
Lu vapuriettu vecchiu ca chianu si ndi scia cu Coco iastemandu tutti li santi mia,
passatu lu canali girava chianu chianu, e si ndi scìa alla tretta, nu picca cchiù luntanu.
Rrivava allu puntile, allu stabilimentu, tutti ca si ndi scìunu e iu eru cuntentu
ti stari sulla spiaggia, a culu a punzignuni, o ti fari lu bagnu cu tutti li vagnuni.
E quando poi la sera mi ndi turnava a casa, addò si statu, tiavulu, cè cazzu a cumbinatu?
Li cazi tutti ruetti, matonna ccé ruvina, lu sangu ti sta essi, ce à fattu stamatina?
Stasera no ssi mangia, cussì ti mpari buenu, ma iu era abbituatu a tuttu stu vilenu.
Moi ca so vecchiu, critimi, no tegnu cchiù cce fari, mi ssettu chianu chianu, ccumenzu a ripinzari
a Brindisi com’era, ci sapi com’è moi, tant’anni so passati, sessanta e chiù e poi;
io vivu assai luntanu, no tegnu sette figghi com’era a casa mia, na tana ti cunigghi.
Ca iu si m’ind’ascìa e non ci stavu a casa, n’autru cu lu pani facìa tabbula rasa;
la fame era ti casa, ttanuma mi dicìa: osci pigghia li rizzi, bravu lu figghiu mia,
nò ti scurdà, pardisina, dodici pi ciascunu, nannuta, ca li piacunu, pi primu lu patrunu.

E m’era fattu puru la mascara cu vesciu, lu vetru ti na sveglia, matonna mia ce presciu
sciri sott’allu mari, cu cercu ti mangiari, cu na furchetta an manu li rizzi avìa a pigghiari.
E quandu ca turnavu, li rizzi intra na cesta, li spini ntra li diti, a casa era na festa;
ce vuei, tu l’a mangiati, non nci ndi stannu chiui, ci ti va cuerchi stuta, non ci pinzari a nui.
E mi ndi scìa a curcari penzandu alla banchina, lu suli ti la spiaggia, li fimmini e la rena.
Penzandu a mestru Coco ca sempri iastemava li muerti ti lu Carmine, la varca ca fumava,
l’azzurru ti lu mari, la puzza ti la genti, l’affutu n’tra lu nasu, lu vientu ti ponenti.



Mario Galasso,
Alghero novembre 2009