Poesia » 08/03/2010

L'8 Marzo è donna. Di Giancarlo Zullino

Tuttu lu giurnu, la sera, la notti,
battìa e mi batti forti lu cori
ca sempri riclama, e no’ si ndi fotti
alla ricerca cuntinua t’amori.

Provu a pinzari com’era lu mundu,
lu ‘mmagginu stranu senza la “ donna “
comu vitèri lu quadratu tundu
e no’ sapèri ce t’eti la gonna.

Sicuru, nu mundu fattu ti petra;
lu mari senza fundu e senza cimi
li muntagni, cu roccia a cartavetra;
nienti sci, nienti varchi, nienti rimi.

No’ lu riescu propia a ‘mmagginari,
mancu lu soli ca scarfa nu cori;
nienti staggioni: sulu ‘nvirnati,
nienti zita, mugghieri, mamma, sori.

Cussini quiddu era nu postu tristu,
anveci: soli , mari, e tanta fiuri
intra li prati, ti culori mistu
e rosi cu spini pi li tulùri.

Femmini! Siti rosi prufumati.
Nu’ simu l’api ca a ma fari lu meli,
ti ‘ddu prufumu simu ‘ccalappiati
e na vota ntra li magghi ...eti fèli.

Rosi a bocciolu o rosi spampanati
Bbeddi ti fori ma sempri spinusi
Bianchi, rosa, gialli russi e striati,
disidirati ma tanta ‘zziccusi.

Tu vieni trattata comu Rigina
Comu l’apa ndi tocca vulari,
e pi ‘ddu meli ti prima matina
cirnendu sobbra li fiuri a fatiari

si fatìa pi nu stuezzu ti pani;
quantu vilenu pi fari na rodda
dopu ca a fattu li caddi alli mani
la sera ti tocca pani e cipodda.

Ma nisciuna sciurnata eti mai chena
Ci no tieni ‘ddu fiatu, ‘ddu calori,
‘ddu sangu ca ti scorri intra la vena
ca ‘rriva allu Cori e scoppia d’amori.

Giancarlo Zullino