|
Poesia » 22/08/2010
Apologia della frisedda. Di Cosimo Ottaviano
Ti pressa uè cu sana nu cristianu?
Cu s’az’amprima e cu si ‘mpizza tisu?
Na frisa l’a purtari, ti quiddi fatti cullu cranu.
Non ci criti? Lu puerti trittu a’mparatisu!
Cu rimodda, ‘ntrall’acqua sulu na passata,
to’ pumbitori, sali e na croci ti uegghiu,
arienu, ci ‘ndi tieni, giustu na ‘ndurata,
e viti, a paraconi, ce ‘nci sta’ ti megghiu?
Mancu arriva’ambocca, si spracina,
e manda ‘ntr’alli naski quidd’addori
ca tant’anni andretu lu sintivi alla cucina
addo’ la nanna ‘nci ’mbiscava lu sapori.
Skanava culli puzi la pasta e lu luvatu,
‘l’igghi nci llassava alla mattra e alli tajeddi,
ma quando lu furnaru era turnatu,
l’ora no vitivi cu suppavi to’ friseddi.
Cosimo Ottaviano
|
