|
Poesia » 29/06/2011
BBunazza. Di Giancarlo Zullino
Matonna ccè bbunazza stamattina.
Eti na meraviglia stu calori,
prestu m’aggiu armatu ti brandina
pi li primi raggi ti quistu soli.
La prima spiaggia ch’è vinuta a tiru
A ccè issi a ponta a Sbitri: “ Acqua Chiara”,
ntra l’acqua ch’è nu specchiu mi va’ mmiru,
la sabbia sta’ stinduta para para.
Lu soli m’incarizza toci toci
La dddori ntra li naschki ti lu scuegghiu,
Lu mari ca sussurra cu na voci
Mi trasi ntra lu cori, e stau megghiu.
Ntra la sabbia na bambula ti pezza,
nu iundulu la scopri ed essi fori,
nu iundulu muvutu ti la brezza
e nienti chiù ti quistu… mi nnammora.
Giancarlo Zullino
|
