26/12/2008

La Siggitedda. Di Francesco Bove


Francesco Bove è nato a Brindisi il 5 febbraio 1944. Ha quattro figli di cui due femmine.
Emigrato a Milano nel 1964, si è laureato in economia e commercio all’Università “L. Bocconi” e poi in giurisprudenza all’Università Statale. Revisore dei conti, si è abilitato dottore commercialista. E’ stato manager nella sanità.
Ora è nonno e pensionato.

"La Siggitedda" rappresenta un ricordo per tutte le madri brindisine.
Su Brundisium.net sono state pubblicate alcune sue composizioni nelle quali si cimenta a scrivere memorie di una Brindisi vissuta con semplicità e dignità, che non ha mai dimenticato. Clicca qui per i links

LA SIGGITEDDA

T’haggiu rivista ssittata
sobbr’a ‘dda seggia ccattata
a Oria ti la festa ti li santi
addò vannu tutti quanti;

‘dda seggia no’ l’haggiu jaticata,
pircè pi’ ricordu l’haggiu tinuta
quandu a crochet fatiavi
e lu tiempu ‘ngannavi.

L’acchiali ti lu nasu scindia
e ‘stu fierru
facivi sceri cu maistria,
no’ mi lu scerru!

Quandu Diu ti chiamau
casa tua mi pigghiau;
cuperti culurati truvau
ca cu tanta zenzuli jaticau;

cosi ca frauma no’ ti facia fari
pircè no’ capia ca lu tiempu
vulivi ‘ngannari
e ti mintivi a sfirruzzari.

Paria ca ‘na cunsegna ieri a fari
e ci no’ tinivi lana o cuttoni
ti mintivi a disfari quarche maglioni:
li uecchi ti facivi schattari!

Tuttu stipavi,
tuttu ‘ccugghivi,
tuttu cunsirvavi,
tutti sciuticavi;

no’ lu facivi pi’ cattiveria
ma pi’ paragoni
ti quand’ erumu vagnuni
e nc’era tanta miseria!

Mo’ ca ieri a guderi
li frutti ti li sacrifici
t’hannu misu li razzi an croci
e ‘mbrazzi a Diu t’hannu fattu sceri.

So’ cunvintu pur’iu
pircè mali no’ nd’ha’ fattu
puru ca cu la lengua, perdiu,
rraffavi comu a ‘nu jattu!

Ti sera quandu rincasu
e mangiu aulii e casu
‘nu sguardu a ‘dda seggia tau
e pari ca ‘nziemi a tei ssittatu stau.

‘Sta pienzi a ‘n’atra sciurnata
c’ava passari
e la rota no’ sempri cussi ava girari
e ndi ripiti sempri la stessa sirinata:

Figghi mia, la vita eti ‘na ‘nfurrata,
eti ‘na sciurnata vissuta,
eti ti vinu ‘na mbriacata
è bedda ci la vivi spinsierata!

Francesco Bove
Brindisi, 30 giugno 2006