Oggi il suggestivo rito dell’Ultima Cena e dei Sepolcri
Sciuvitia Santu
Ntra lla Sittimana Santa,
cu lla genti sempri tanta,
a lla Chiesa si fucia
pi llu Santu sciuvitia.
Santa Messa cilibrata
comu Crištu l’è llassata,
ddo a ll’Apoštuli, piecatu,
pieti a ttutti l’è llavatu.
Štu missaggiu nd’era a ddiri
ch’è vvinutu pi ssirviri,
e lla morti è ssuppurtatu
cu ndi lleva lu piccatu.
A lla cena li nvitau,
cu llu cori li parlau,
pani e vvinu cunzacrau
nsiemi a lloru lu mangiau.
Li lassau cu nnu sgumientu
cce parlau ti tratimientu,
mai nišciunu si spittava
ca ntra lloru, propria, štava
cuddu ca si lu bbaggiava
e trenta sordi uatagnava,
pi vvindi’ Noštru Signori
comu crandi marfattori.
Crištu foi, ccussì, rrištatu,
e a nna croci fò chiantatu.
Toppu, Giuta si pintiu
a nna ntenna si ppindiu.
Nc’è ll’usanza ti girari
7 Chiesi a vvisitari,
ma no è ppi ppassiggiari
ddà nc’è Crištu t’aturari.
Ci la genti nci pinsava,
mentri Crištu visitava,
a lli suffirenzi atroci
cu vv’a mmori, puru, ‘n croci,
nn’atru mundu nc’er’a štari,
cciò ch’è ddittu s’er’a ffari:
Nienti uerri, simu frati,
t’ogni rrazza e dd’ogni etati.
Emanuele Castrignanò
No Comments